ပြည်တွင်းမှာ မိုဘိုင်းဖုန်းတစ်လုံးကို ဘယ်လိုရွေးချယ်ဝယ်ယူမလဲ

        ဒါဟာစဉ်းစားစရာတစ်ခုပါ။ အခုဆိုရင်ပြည်တွင်းမှာ OS မျိုးစုံက ဖုန်းတွေဝင်ရောက်လာပြီ ဖြစ်တဲ့အတွက် အခုအချက်ကိုစဉ်းစားမှရတော့မယ်။
(၁) ဖုန်းလိုင်းကိုအရင်ရွေးချယ်ပါ။
           ပြည်တွင်းမှာဖုန်းဝယ်တော့မယ်ဆိုရင် အရင်ဆုံးစဉ်းစားရမှာက ဖုန်းလိုင်းပါပဲ။ CDMA ၀ယ်မှာလား၊ GSM ၀ယ်မှာလား ဆိုတာကတော့ မိမိအသုံးပြုမယ့်နေရာဒေသ၊ အသုံးပြုလိုတဲ့ပုံစံကို စဉ်းစားရပါမယ်။ GSM နဲ့ CDMA 450 က နယ်ဒေသမှာအသုံးပြုဖို့နဲ့ ခရီးခဏခဏ သွားရတတ်တဲ့သူတွေ အသုံးပြုသင့်ပါတယ်။ CDMA 800 ကိုတော့ မြို့ကြီးပြကြီးမှာ အခြေချနေထိုင်မှုများတဲ့သူတွေနဲ့ သင့်တော်ပါတယ်။
(၂)ဟန်းဆက်အမျိုးအစားကိုစဉ်းစားပါ။
       ဟန်းဆက်ဟာ ဖုန်းအသုံးပြု သူတစ်ယောက်အဖို့ အရေးကြီးတဲ့အစိတ်အပိုင်းတစ်ခုဖြစ်ပါတယ်။ GSM အတွက် ဟန်းဆက်မရှားပေမယ့် CDMA အတွက်ကတော့ အမှတ်တံဆိပ်နည်းနေပါသေးတယ်။ အထူးသဖြင့်CDMA 450 MHz ဆိုရင် ဟန်းဆက်ရွေးချယ်မှုအပိုင်းမှာ ပိုမိုခက်ခဲနေပါတယ်။အခုတလောတော့ CDMA 450 MHz အမျိုးအစားတွေဝင်လာပါပြီ။
(၃) Phone OS ကိုလည်းရွေးပါ။
        မိုဘိုင်းဟန်းဆက်တွေမှာ သက်ဆိုင်ရာ Device တွေအလိုက် OS တွေရှိကြပါတယ်။ လက်ရှိအချိန်မှာတော့ Apple ရဲ့ IOSနဲ့ Googleရဲ့ Android OS တွေကတော့အသုံးပြုသူ များတဲ့OS တွေပဲဖြစ်ပါတယ်။ Nokiaရဲ့ Java OS ကလည်းနာမည်ကြီးပါတယ်။
(၄) အသုံးပြုမည့် ပုံစံကိုစဉ်းစားပါ။
        ဖုန်းတစ်လုံးရွေးချယ် ၀ယ်ယူမှုအပိုင်းမှာတော့ အသုံးပြုလိုတဲ့ ပုံစံကအရေးပါပါတယ်။ ဖုန်းကို အများသုံးဖုန်းတစ်လုံးအဖြစ် အသုံးပြုမယ်ဆိုရင်တော့ လိုင်းဆွဲအားကောင်းပြိး အကြမ်းခံနိုင်မယ့် အထိုင်ဖုန်းပုံစံမျိုးကိုရွေးချယ်သင့်ပါတယ်။ တန်ဖိုးနည်းဟန်းဆက်တွေလည်း အများအပြား ပြည်တွင်းဈေးကွက်အတွင်းမှာရရှိနိုင်တဲ့အတွက် ယခုအချက်ဟာ အသုံးပြုသူများ စိုးရိမ်စရာအချက်တစ်ချက်တော့ မဟုတ်ပါဘူး။
(၅) နည်းပညာပိုင်းဆိုင်ရာ လိုအပ်ချက်များပြားသော ဟန်းဆက်များကို နယ်ဒေသများတွင်မသုံးသင့်ပါ။
         iPhone ဟာ နည်းပညာ မြင့်မားတဲ့ ထုတ်ကုန်တစ်ခုပါ။ ဒါပေမယ့် နည်းပညာဖွံ့ဖြိုးမှုအားနည်းတဲ့ နေရာဒေသတစ်ခုမှာ သွားေ၇ာက်အသုံးပြုမယ်ဆိုရင်တော့အသုံးပြုသူအတွက် အခက်အခဲတွေ ရှိလာနိုင်ပါတယ်။ ဟန်းဆက်အပိုပစ္စည်းရှာရခက်ခြင်း၊ နည်းပညာပိုင်းဆိုင်ရာ အခက်အခဲများ ဖြေရှင်းနိုင်ရန်အတွက် ပညာရှင်ရှားပါးခြင်းတို့ကို ကြုံတွေ့လာနိုင်ပါတယ်။
(၆) အရည်အသွေးမြင့်၍ စ်ိတ်ချရသော အမှတ်တံဆိပ်ကို သုံးစွဲပါ။
       ဈေးကွက်အတွင်းမှာ တန်ဖိုးမျိုးစုံ၊ တံဆိပ်မျိုးစုံနဲ့ GSM,CDMA ဟန်းဆက်များဝင်ရောက်လာပါတယ်။ယုံကြမလားတော့မသိဘူး..ကမ္ဘာကျော် iPhone 4S ကို ၈သောင်းနဲ့ရောင်းတယ်တဲ့..။iPhone 4S နဲ့တစ်ပုံစံတည်းပါပဲ.System ကတော့ကွာတာပေါ့နော်.။ အဲ့ဒါဟာ Made in China ပါ.။ရေရည်အသုံးပြုဖို့ စဉ်းစားမယ်ဆိုရင် အရည်အသွေးမြင့်တဲ့ အမှတ်တံဆိပ်များကိုသာ ၀ယ်ယူသုံးစွဲသင့်ပါတယ်။ ဒါမှသာ အသုံးပြုသူတစ်ယောက်အနေနဲ့ စိတ်ညစ်စရာအကြောင်းအရာတွေကို ဆက်လက် မကြုံတွေ့ရမှာဖြစ်ပါတယ် .. ။
(၇)စိတ်ချယုံကြည်ရတဲ့ ဟန်းဆက်အရောင်းဆိုင်တွေမှာ ၀ယ်ယူပါ။
          နာမည်ကြီးအမှတ်တံဆိပ် ဟန်းဆက်များဟာ ပုံစံအမျိုးမျိုးနဲ့ဝင်ရောက်လာလို့စစ်မှန်တဲ့ ကုန်ပစ္စည်းတွေရှိသလို၊ ဆင်တူရိုးမှား ကုန်ပစ္စည်းတွေကိုလည်း ပြည်တွင်းဈေးကွက်အတွင်းမှာ ကြုံတွေ့နိုင်ပါတယ်။ကျွန်တော်ပြောခဲ့သလိုပါဘဲ..။ ဒါကြောင့်မို့ဟန်းဆက်တစ်လုံးဝယ်ယူတော့မယ်ဆိုရင် စိတ်ချပြီး ယုံကြည်ရမယ့်ဆိုင်များမှာ ၀ယ်သူခြင်းဟာ အသုံးပြုသူများအတွက် အကောင်းဆုံး ဖြစ်ပါလိမ့်မယ်။
(၈) ဖုန်းနဲ့ပတ်သက်တဲ့ အကြောင်းအရာများကို လေ့လာထားပါ။
            ဖုန်းနဲ့ပတ်သက်တဲ့ အခြေခံအကြောင်းအရာတွေ များများစားစားမရှိပါဘူး.။ ဖုန်းနံပါတ်မှတ်သားခြင်း ၊ SMS ပို့ခြင်းအစရှိတာတွေကိုလေ့လာထားသင့်ပါတယ်...။ Sim Lock ချမိတဲ့ပြဿနာမျိုးကို မဖြစ်ပေါ်စေဖို့အတွက် ဖုန်းမ၀ယ်ခင် ဖုန်းအကြောင်းကြိုတင်လေ့လာထားခြင်းဟာစိတ်အချရဆုံးဖြစ်ပါလိမ့်မယ်.။  ကိုယ်စီးမယ့်မြင်းအထီးလား..အမလား..ခွဲခြားတာနဲ့အတူတူလောက်ပါပဲ...။
(၉) ဖုန်းတစ်လုံးရဲ့ လိုင်းဆွဲအားဟာ ဟန်းဆက်အပေါ်တွင် သက်ရောက်မှုရှိပါသည်ကို သတိပြုပါ။
           ဖုန်းသုံးစွဲသူအများစုဟာ လိုင်းဆွဲအား ကောင်းမွန်တဲ့ ဖုန်းလိုင်းများးကို အသုံးပြုချင်ကြပါတယ်။ ဟန်းဆက်ရဲ့လိုင်းဆွဲအားဟာလည်း အဓိက အခန်းမှ ပါဝင်ပါတယ်။ အထူးသဖြင့် CDMA အသုံးပြုသူများအနေနဲ့ လိုင်းဆွဲအားကောင်းမွန်တဲ့ ဟန်းဆက်မျိုးကို ရွေးချယ်သင့်ပါတယ်။
                                                                                                                                                                        "သမင်လေး"